Balor di bo Voto

Ku un elekshon importante dilanti porta lo bo pensa ku e artíkulo aki ta pa stimulábu bai vota. Intenshon di e artíkulo aki ta pa konsientisábu tokante balor di voto den relashon ku otro derechi i obligashonnan di un siudadano.

Opinion di hopi den nos komunidat ta ku ta ora bo vota, i asina hasi uso di bo “derechi sagrado”, bo tin algu di bisa. Ami no ta di akuerdo ku e ponensha aki pa algun motibu di kual lo mi ke amplia riba dos.

Konsiderá un dosente ku tur dia, despues di skol, ta yuda muchanan di ménos rekurso ku nan tareanan, ku djasabra ta lider na un padvinderij  i ku un djadumingu pa luna ta yuda un klup di atletismo. Pa motibunan di prinsipio, e no ta vota. Konsiderá tambe un kabayero ku 6 yu plamá aki i aya, ku no ta kontribuí den nan edukashon, ku ta biba riba lomba di e mamanan, ku no tin trabou fiho pero ku ta kue djòp ora e mester. E ta vota “religiosamente”. Kua ta kontribuí mas na nos sosiedat i, konsekuentemente, ken tin mas di bisa?!
Lesa mas...

Curtis Meris: Reflekshon pa Young People and Politics

Amigunan tur saludos,
Mi ke saludá boso den nòmber di Hesus i Maria. Riba invitashon di presidente di Young people and Politics mi ke dirigí mi mes na boso sigur no komo un polítiko ni un eksperto riba e área aki sino mas bien komo un persona preparando pa Saserdote ku ta karga e speransa ku un dia nos pais por tin Pas, Union i Hustisia.

Ta netamente den e wikènt ku nos Iglesia Katóliko a selebrá e fiesta di Kristu Rei ku mi a risibí e petishon aki. Un fiesta ku a kuminsá na aña 1925 establesé pa Papa Pius XI, i ku tin komo meta pa rekordá tur lider di mundu ku e Rei real di Mundu ta Hesus. E outoridat ku nos lidernan ta karga no ta di nan pero di Dios, es desir nan tin un kompromiso ku Dios atraves di nan kompromiso ku Dios su pueblo.
Lesa mas...

Eugene Maduro - politika i ensenansa

Maneho di enseñansa i e edukashon rondó di esaki no ta responsabilidat mas di gobièrnu? Akaso mandatarionan enkargá ku enseñansa di e último dékada a aseptá e kartera akí pa laba man for di desishonnan krusial ku mester tuma? Poncio Pilato e ora ei? Último desaroyonan a demostrá ku polítika i maneho di idioma den enseñansa no ta responsabilidat mas di gobièrnu, pasó ta direktiva skol i mayornan ta disidí riba e asuntu akí. Mi no sa kon e pueblo akí por biba ku un inkomodidat asina. Ku tur rèspèt pa direktivanan di skol i tambe mayornan, pero asuntu di idioma den enseñansa no ta konserní e gruponan akí. Ta responsabilidat di minister i diputadonan pa tuma tipo di desishon akí. Ta p’esei nan ta polítiko. Pa tuma desishon! Si akaso nan mes no ta kompetente, ta nan deber di preokupá, atendé resultadonan di investigashonnan hasí pa nan tin konosementu di desaroyonan i tuma e desishon apropiá ku ta duna mas benefisio.
Lesa mas...

Di bo tambe su voto ta dependé ku nos por sigui ehersé e derechi pa krea i partisipá libremente na aktividatnan kultural

Pa hopi hóben polítika ta algu masha apstrakto. Algu ‘far far away’.  No ta strañami ku serka hóbennan ta biba e sintimentu  ku komo hóben sigur  bo no por aportá i partisipá realmente na preparashon dje plato sekreto i mágiko ku yama polítika. Anto laga nos ta sinsero, e komunidat aki - inkluyendo mi mes-, por hasi mas esfuerso pa inkorporá, enbolbí hóbennan den polítika.

Hopi biaha bo ta tende ‘tur e polítikonan ei te mesun kos’, niun  no ta sirbi’, ‘tur ta buska pa saka probecho pa nan mes’, ‘niun no ta konvensémi’ (Porta masha bon, aunke ainda mi ta kere ku tin polítiko ku bon intenshon, ku ideal, ku vishon, ku ke e pais aki bon i ku ta para mas habri ku otro pa input di pueblo, inkluyendo esun di hóbennan; pero unabes nan haña nan mes den e forsa kolektivo dje warwarú ku yama polítika, no ta fásil pa keda para mesun kaminda, sin ku forsa dje bientu ei afektábu).
Lesa mas...

Vishon i sinergia

Skibi pa Raygen Zuiverloon
Un partido polítiko mester tin un vishon klaro, un vishon ku a wòrdu fórmula a basa di deseo di su pueblo, teniendo kuenta ku e realidat i tambe e mundu ku nos ta biba den. Anto hopi importante kerensha den e vishon di su mes partido polítiko. E partido ku ami lo ke vota pe mester tin un plan di akshon kon pa realisá e vishon ku e ta presentá na pueblo. I ta transparente den su maneho.

E partido p’ami mester mustrami kiko e ta bai hasi riba e diferente tereno manera, enseñansa, turismo, infrastruktura, etc. i mas importante e sinergia ku tin entre nan.

Laga nos wak Kòrsou komo un kompania, ku tin su “core bussiness” nan manera; turismo, offshore, haf, su “public relation” manera; CTB, deporte. I su “human resources and innovation” komo; enseñansa i kultura. E kompania Kòrsou ta drai pero esaki por hopi mas mihó si riba tur e terenonan aki nos traha pa yega un meta komun.
Lesa mas...

Vota konsiente, nos deber!

Mi ta agradesido pa e oportunidat risibi pa duna bos komo un hoben aktivo den komunidat, pa komparti mi opinion pakiko mester vota konsiente.

Politika pa hopi hoben ta ser konsidera komo un kos ku nos niun ke tende ni mira nada di dje.
Importante si ta, ku nos mester realisa ku e influensha politiko ta ensera tur kos.
Manera e dicho ta bisa “Si bo no mete ku politika, politika ta mete ku bo”. Lesa mas...

Abo ta vota konsiente?

E mishon di Young People & Politics Foundation ta pa invertí i edifiká riba e poder di hóbennan pa logra un kambio progresivo den e proseso polítiko i kambia e manera kon polítika ta wòrdu hasi na Kòrsou.

Ami ta soña ku un Kòrsou kaminda tur hende ta pensa i sa ku nan por. Kaminda bo por lesa e positivismo riba kara di tur hende. Un Kòrsou kaminda tur hende, pa hóben ku nan ta i pa insignifikante ku nan ta parse, sa ku nan ta konstruyendo un pais, nos Pais Kòrsou. Kaminda tur hende tin e kurashi pa soña i soña grandi.

Un Kòrsou kaminda hóbennan ta konsiente di nan futuro i e ròl di polítika den esaki i p’esei nan ta partisipá aktivamente den e proseso di tomo di desishon.
Lesa mas...

Introdukshon di Young Voters Rock

Young Voters Rock (YVR) ta un proyekto di Young People & Politics Foundation (YPP), ku ta un fundashon ku a wòrdu inkorporá ku e meta pa promové mas partisipashon di hóbennan den polítika, den e sentido mas amplio di palabra.

YVR ta un proyekto di hóben pa hóben ku a wòrdu lansa spesialmente pa e elekshonnan binidero.

E mishon di e proyekto aki ta pa invertí i edifiká riba e poder di hóbennan pa logra un kambio progresivo na Kòrsou. E proyekto aki lo wòrdu lansa ku e mira riba un futuro briante pa un Pais Kòrsou nobo.
Lesa mas...